#我有個Page #講咩先 － 老闆娘 Toby
「Hello！大家好，我係老闆娘Toby。大家可能好好奇點解我叫做老闆娘呢？你會睇我呢個page可能知道我係《警訊》演員，但『老闆娘』個名又係點得嚟呢？
其實我唔係『自稱』老闆娘，亦唔係因為開舖頭，而係因為《警訊》其中一集假金騙案入面，因為飾演當鋪老闆娘，戲內我要扭腰又跳晒舞，加上惡死嘅演出，令到人哋記得我，之後個個見到我就叫我『老闆娘』。
原本我係全職專業化妝師 ，由2014年加入《警訊》做演員，當初入行都係機緣巧合下由警訊之花Heily Ma介紹我去拍。初初拍時，因為我形象唔係普通人心目中理想嘅靚女型，所以好怕人哋認得我，純粹為賺錢而工作，但無諗過到後來自己喺會真真正正鐘意演戲。
令我真正愛上演戲嘅最主要原因，係網上面嘅評論同每一位網民嘅支持，當然啦都會有負評，例如：咁醜都可以拍戲、好心咁肥就唔好出鏡啦、香港電台無演員咩…但當我再睇到其他人留言：真系好好笑、演得好好、俾心機我支持你…每次有片喺網上發佈，我都會Click入去睇晒，令我知道原來自己都可以帶開心俾其他人，好多人都唔會因為我肥而歧視我，令我覺得自己係有意義。
慢慢開始，我就搵到自己嘅方向同形象，所以我就開咗『老闆娘Toby』呢個page，同各位分享我嘅一切。無論係拍戲、生活日常、旅行、化妝扮靚，都會透過呢個Page開心Share俾各位，希望帶到更多歡樂同正能量俾大家！」
如果你都有個 Page，與更多人分享你的故事，事不宜遲，立即到 adfocate.com/hk/adfocate 登記成為 Adfocate一份子，成為不一樣的 KOL！
Search